2018, Maiatza

Gozatzeko egunak dakartza La Salle Asteak

Gaur eman zaio hasiera La Salle Asteari ostiralera, maiatzak 18ra, bitartean luzatuko den egitarau zabal batekin. Ikasleek erruz gozatzeko moduko jarduerak antolatu dira egun hauetarako. Dantza, eskulan saioak, jolasak, txokolatada, puzgarriak, buruhandiak… LHko ikasleek ostegunean bazkaria ere eskolan egingo dute. Helduenek, DBHko neska-mutilek, berriz, ostiralean ospatuko dute gynkana bat kaleetan zehar eta sukaldaritza lehiaketa eginez. 

2018, Maiatza

Bideko hezkuntza, bizitzarako hezkuntza

Eskubideak aldarrikatzeak betebeharrak ere nor bere gain hartzea dakar. Horrela izan beharko luke behintzat. Horixe da Haur Hezkuntzako umeek ikasi dutena arau jakin batzuk adostuz ikastetxean dituzten “ibilgailuak” ez daitezen liskar-iturri izan. Triziklo, patinete eta motorrak partekatzea ematen duena baino zailagoa izan daiteke. Haserreak eta negarrak saihesteko, arazoari konponbidea bilatu die modu praktiko eta eraginkorrean.  

2018, Maiatza

Emandako bihotz bat taupadaka dutenen bizipenak

DBH3ko Elene Albisuak, Iker Ruedak eta Iñaki Castillok gonbidatua, ATCORE-Euskadiko Bihotz eta Birika Gaixoen eta Transplantatuen Elkarteko presidentea den Josean Arteaga izan da ikastetxean. SEIN proiektuaren baitan, ikasle taldeak bihotz artifizialen mundua eta elkartasuna uztartu nahi izan ditu, hurbiletik ezagutuz, dioten bezala “donazioekin  bizitzak salbatzen direlako“. 

2018, Apirila

"Arco-Iris Antzerki Taldeak "¿Y quién nos manda hacer teatro? estreinatuko du

Urteroko hitzorduari leial eutsiz, Arco-Iris Antzerki Taldeak ostiral honetan, apirilaren 27an, “¿Y quién nos manda hacer teatro?” estreinatuko du. Hasiberria den aktore talde batek justu eszenatokira atera aurretik dituen bizipenak kontatzen ditu antzezlanak. Arco-Iris taldeak funtzio bikoitza eskeiniko du Zelai Arizti aretoan. Lehenengo emanaldia 19:00etan izango da eta bigarrena, 22:00etan. Aurreko urteetan bezala, ikuskizun solidarioa izango da gainera. Irabaziak Proyde eta beste hainbat GKEtara bideratuko dira.

2018, Apirila

Liburuari omen

Ikasleek liburuari omenaldi ederra egin diote Liburuaren Nazioarteko Egunaren harira. Irakurketaren plazerra deskubrituz ospatu dute eguna. Liburuak trukatu eta Udal Liburutegia ere bisitatu dute bertako zerbitzuak ezagutzeko. Izan ere, denok izan beharko genuke mesanotxean liburu bat. Ezagutza iturri izateaz gain, liburuek bizitza errealean ihes egiten diguten  abenturetan murgilarazten gaituzte pertsonaien bidez. Ondo ospatzeak merezi duen eguna da Liburuaren Eguna. UNESCOk sustatuta, 1995etik ospatzen da.

2018, Apirila

Ikasleak merkataritza txikiaren sustatzaile

La Salle Legazpiko ikasleak merkataritza txikiaren babesle sutsu bilakatu dira Bi-Tartean- Urretxu eta Zumarragako Merkatarien Elkartearekin elkarlanean. SEIN programaren baitan, DBH4ko ikasle talde batek merkataritza txikiaren inguruko azterlana egin du ikasturte honetan zehar, komertzioak dituen ahuldade eta indarguneak ikusi eta indartzeko estrategia posibleak landuz. Lana borobiltzeko gynkana bat antolatu dute ikasleek gaur arratsalderako eta LH3,4 eta 5eko ikasleek hartuko dute parte jokoetan.

2018, Apirila

Anai Robert Schieler, La Salleko Anaien Anaiburu Orokorraren bisita Espainiara

Anai Robert Schieler, La Salleko Anaien Anaiburu Orokorra, apirilaren 8tik 21era Espainian izango da bisita pastorala egiten, bere helburuen arteko bat izanik Espainia eta Portugalen La Sallek hezkuntza misioarekin duen konpromisoa ezagutzea. Anai Robert Schieler-en bisita pastoral hau, munduan La Sallek bizi duen errealitatea ezagutzeko Anaiburu Orokorrak Anaidiko Kontseilari Orokorrekin batera egiten dituen bisitetako bat da.